قبل الانتحار بساعات
نص بالعامية المصرية للكاتبة مروة أحمد
ما بيني وبينه كام ساعة
وكام قسوة، وكام صدمة
ما بيني وبينه كام ضلمة
على كام حلم تاني يموت
ما بيني وبينه قطر يفوت
يزيد من حزني وجروحي
وروح بتشيل معَ روحي
سنين الوحدة ويّا الخوف
ما بيني وبينه بس ظروف
بتهدم كل أفكاري
وتقطف كل أزهاري
وتملى حياتي حزن وعك
ما بيني وبينه حبّة شك
وجايز أهلي والاصحاب
ما بيني وبينه يمكن باب
موارب بس مش مفتوح
وجايز بيننا حبّة بوح
وكام قصة، وكام صورة
ما بيني وبينه أسطورة
بتحكيلي إن بكرة اهو جيّ
وبين ايده هييجي الضيّ
وتشرق شمسي وتساعني
وايد تسند ما توجعني
ونبني ذكريات تانية
ما بيني وبينه: "الدنيا"
وشيء بيقولّي اوعى تسيب
ضمير يهاجمني بالتأنيب
وصوت بيقولّي يمكن خير
ما بيني وبينه حزن كبير
وكام تبرير، كلام تصبير
ما بيننا ثواني معدودة
وحبّة ذكرى مهدودة
معادش ما بيننا شيء بيعيش
ما بيني وبينه.. قصدي مفيش
يجوز ينقصنا بس وداع
ودمع يليق مع الأوجاع
بيبكي الحزن والأيام
يجوز لسه ما بيننا كلام
بيقدر صمتنا يحكيه
سكوت يمكن مالوهش شبيه
وأحزان يامَا متشالة
يجوز بيننا كذا رسالة
بتحكي بس من غير صوت
ما بيني وبينه شيء بيموت
ما بيني وبينه قصدي مفيش
معادش ما بيننا شيء بيعيش"
ده كان مرسال بلا وجهات
لحد مالوهش إلا سُكات
محدّش ضمّه إلا الأرض
ونَطّ يضمّها، راح مات
ليست هناك تعليقات:
إرسال تعليق