مش ضعيف - الشاعر مؤمن الظنى

 

كتب الشاعر مؤمن الظني نص بالعامية المصرية من النصوص التي جذبت قارئيها 

 

مش ضعيف 

لكني باضعف كل ماتمُر السنين وأنا لسه وحدي

مش بخاف العمر يجري..

طب مايجري ..هو يعني هيكتبولي صَك بخلودي ف حياتكم ؟

كل ما أرجوه تعيش ذكرايا فيكم 

كل تفاحة أكلها الحُزن فيا ...مادوقتهاش 

أتمني ادوقها ..

كل شجرة زرعتها علشان تضلل 

جِه شيطان الخوف سَرقها 

ياصحابي بلاش صُوركم لو بدوني 

لو خدتني الدنيا لحظة للنهاية ..إبدأوني

أرفضوا لحظات غيابي ...وفكروني

إني ليا جوه روحكم بيت وضِلة 

"بُكره تتعود وتنسي "

بُكره جه وأنا قلبي مِتشعبط وفاكر

لما نار الشوق تاكلني ..

هل هتسعفني  التذاكر ؟ 

هل هلاقي عنيكي مشتاقة لرجوعي ؟!

لما يقتلني السَهر وعنيا تِفضي 

هل هتشتاقي لدموعي !

هَل طيفِك فيا بَرجِل كل حتة 

نوتة صافية بلحن شرقي 

روح بريئة فى جسم خايف 

قلبي قاعد جوه أوضته حزين عليا 

أما قلبِك حَط رُوچُه علي الشفايف 

يابلادي 

ياقصيدة كتبتها لحظة ميلادي

ياسبب شوقي وعذابي 

وإغترابي ..

سَحلتي وضياع شبابي 

يابلادي

النشيد جوايا مِتردد بيبكي 

لسه واقف فى الطابور والخِتم قَرب

فين هَنهرب ..

هو ينفع حد زيي يقول كفاية؟

هو ينفع أبقي عَيل فى الحكاية ؟!

فى بلادي عيون بتقتِل لو فَشلت 

فى بلادي قلوب بتتمني أذايا 

صعب أرجع ..صعب اكمِل ..

صعب اعيط لو واحشني أبويا وأمي 

صعب أعيط لو بَحبِك بس بينا بلاد بعيدة 

صعب أكتبلِك قصيدة خالية مِني 

صعب لما يكونلي إبن يقول يابابا ..مايلقانيش

يبقي أحسن لو أموت وماغيبش عَنُه 

يابلادي 

كل دي أحزان لواحد لِسه بادي؟

الليلادي 

مَخدتي زَقتني على طَرف السرير 

مَلت وزهقت ...

* كل دي أحضان كفاية أبوس دماغك 

ياخي خِف حكاوي عن ذِكراك وحلمك 

مش بكيفي ...

طول ما سيفي فـ إيد عَدوي 

فين ألاقي مـ الوَنَس لو غيبتي عَنّي

مين هَيستحمل معايا ..

مين هَيقرا كل مابتمليه عينيا 

مين يترجم صوت بُكايا 

مين هَيتحمل غُنايا ..وصوت نشاذي

مين يسقف لي إذا عجبُه مجازي 

بعتذرلِك ..

النهاردة خلاص مفيش أحضان مابينا 

يوم Free...

جات خدتني فـ حُضنها وقالت لي أسفة

إحنا مالناش إلا بعض ..

 

لِم نفسَك من حيطان البيت وعّزِل وإنعزِل وبلاش تقرّب.. الحيطان مابقيتش ليك 

أوعى تشتاق أو تحِن ل طوبة سَندت يوم إيديك

كنت طفل بتستهجى الإنسانية 

تبكى لو طير إندبح قدام عينيك

 النهاردة كل يوم بتشوف دبايح 

كل يوم فيه حُب سايح عالأراضى 

كل يوم بيموت فى قلبَك ذكرى حلوة 

بنت حلوة 

خَبّطِت على جدر قلبَك إترعشت ومِلت ليها

وأمابِعدت قُلت عادى

شخص راضى 

كل يوم بيموت وقابِل 

يبقى قابل واوعى تشكى لـ أى شارع 

الشوراع إللى حَضنِت فيك غيابها

إيه اللى نابها غير بُكاك وسهر ليلاتى 

لِم نفسَك من حياتك كلها وإقبل هزيمتك

إنتصارك عالحياة مش أمر عادى

" مش ضعيف "
للشاعر مؤمن الظنى